Mbyll siparin Kombëtari i të Rinjve 2025: Ergit Ramaj, në finalet e Kampionatit Kombëtar Individual!

Përfundon pas një gare 7-ditore, në Tiranë, Kampionati Kombëtar për të Rinj. Ky turne u dallua për një pjesëmarrje shumë lartë. Në mjediset e “National Park Tirana” u mblodhën më shumë se 150 shahistë, të grupmoshave të vogla dhe të reja.

Gjatë këtij harku kohor u mbajtën plot 9 Kampionate të ndara: U8, G8, U10, G10, U12 (vajza dhe djem); U14, G14, U16 (vajza dhe djem); U18 (vajza dhe djem), që u finalizuan me kampionët për djem dhe vajza, sipas kategorive.

Dita e sotme kulmoi me kurorëzimin e talenteve të reja ose kampionëve të rinj shahistët, të cilët, në të ardhmen, shpresojmë që të vazhdojnë të jenë të suksesshëm edhe në arenën ndërkombëtare. Një garë e bukur, me entuziazëm, me dëshirë për të luajtur deri në fund të kampionatit, luftë e fortë sportive, që për më shumë se gjysmën e kampionëve, rezultati u vendos në ndeshjet play-off.
Ceremoninë e ndarjes së çmimeve, e çeli dhe përshëndeti Sekretarja e Përgjithshme e Federatës Shqiptare të Shahut, Znj. Majlinda Pilinci, e cila, uroi të gjithë pjesëmarrësit, për më shumë suksese dhe arritje në një sport elitar si ai i shahut, pa harruar trajneret për punën e përkushtuar, si dhe prindërit, për prezencën dhe mbështetjen e vazhdueshme nga ana e tyre. Më pas, u ndanë trofetë, Kupa, medalje dhe diploma për fituesit e tre vendeve të para të secilës kategori, si dhe çertifikata për të gjithë lojtarët pjesëmarrës.

Kampioni U18, Ergit Ramaj, njëherësh fitoi edhe të drejtën e kualifikimit për garën e finaleve të Kampionatit Kombëtar Individual!

Fakti që pati përfaqësues nga të gjitha rajonet e Shqipërisë, tregon se shahu, sidomos nga prindërit ka qenë inkurajues. Klubet sportive “Partizani”, “Tirana”, “Teuta”, “Butrinti” dhe vogelushët simpatikë të Gjirokastrës, ishin më të dalluarit!